Do gifft dat jümmers Tieden, de sünd pattu för'n Moors,
bloots Arger mit de annern; büst eenfach nich up Kurs.
Wat du seggst, dat bringt bloots Striet
un wohen du ook pettst, du pettst in Schiet.
Denn hest du meist keen anner Wahl :
Denn wink bloots af un denk: Ji köönt mi all nu maal !
Du hest al böös verslapen. De Zeitung löggt as dull.
De Koffi smeckt as Water: Dien Mood is meist up Null.
Güstern weer dat veel to laat.
Un du föhlst di, as weerst du halfwegs dood.
Denn hest du meist keen anner Wahl :
Denn wink bloots af un denk: Ji köönt mi all nu maal !
Un hest di denn uprappelt un seggst, dor hölpt keen Klaag,
villicht warrt dat jo klappen. Doch gaar nix slumpt vundaag.
Wat du maakst, dat löppt verkehrt;
dien Fööt sünd di in'n Weg un ook dien Steert.
Denn blifft di meist keen anner Wahl :
Denn wink bloots af un denk: Ji köönt mi all nu maal !
( Zwischenspiel )
Hest du maaleens nu wedder so'n hundsverdübbelt Dag,
Denn draffst di nich lang fragen, an wat dat liggen mag.
Allns to weten bruukt wi nich,
sünst warrt wi doch bloots breegenklöderig.
Denn blifft di meist keen anner Wahl :
Denn wink bloots af un denk: Ji köönt mi all nu maal !